Ghjacumu Fusina

I Culori d’Umani
Postu ch’ellu si tratta d’alzà i culori, micca di falli innariulà è sbattulà cum’è bandere ma di indettà almenu u so caratteru è a so luce, hè megliu à sceglie subitu a tinta o a sfumatura à mezu à quelle chì parlanu à tempu à a mente è à u core. A tavuletta pitturaghja hè quì di e più ricche è l’imbuleghji cumbinati o i cuntrasti sò diversi quant’è quelli di l’opere è di l’omi chì e purtonu in senu cum’è a bellezza di a terra.
Chì a terra hè diversità di i culori è di i modi di vita individuali o cullettivi, di e scelte persunali è suciali, di i pensamenti è di l’ideulugie. Un hè mai uniformità grisgia è orizonte unicu s’ella ùn accade per via di l’annoiu o di qualchì accidente di a storia.
Allora, ch’ellu si parli di pittura, di cantu o di lingua, o ancu solu d’idee, mi piacenu piuttostu à mè e vie originali sode, quelle chì arrecanu à a spressione, ancu in sensu metaforicu, a so verita primiera è u so culore più vivu. Un sò quesse qualità d’Umani ?

Ghjacumu Fusina

Retour | Lien Internet